क्रीडा महर्षी सोनाली निकम : मैदानावरच्या संघर्षातून जागतिक नेतृत्वापर्यंतची प्रेरणादायी ‘सुवर्णझेप’
पुणे | विशेष प्रतिनिधी 
क्रीडा क्षेत्राकडे केवळ छंद म्हणून पाहणाऱ्या समाजाला आपल्या कार्यातून नवी दिशा देणाऱ्या HESPRO Sports Pvt. Ltd. च्या संस्थापिका व मुख्य कार्यकारी अधिकारी सोनाली निकम यांना त्यांच्या उल्लेखनीय कार्याबद्दल ‘ह.भ.प. रखमाजी भालेराव समाज प्रबोधन पुरस्कार २०२५–२६’ प्रदान करण्यात आला.
हा पुरस्कार केवळ एका व्यक्तीचा सन्मान नसून, तब्बल २९ वर्षांच्या प्रामाणिक, निष्ठावान आणि संघर्षमय क्रीडा सेवेचा गौरव आहे.
संघर्षातून घडलेले यश
१९९६ साली कबड्डीच्या मैदानात खेळाडू म्हणून सुरू झालेला सोनाली निकम यांचा प्रवास आज क्रीडा नेतृत्वाच्या सर्वोच्च पातळीपर्यंत पोहोचला आहे. हरियाणा, पंजाब आणि गुजरात यांसारख्या राज्यांमध्ये त्यांनी प्रशिक्षक व क्रीडा व्यवस्थापक म्हणून आपली ठाम ओळख निर्माण केली.
२०१८ मध्ये महाराष्ट्रात पुनरागमन केल्यानंतर, एका महिलेसाठी अत्यंत आव्हानात्मक मानल्या जाणाऱ्या Sports Entrepreneurship क्षेत्रात त्यांनी स्वतःचे स्वतंत्र साम्राज्य उभे केले.
महाराष्ट्राच्या क्रीडा व्यवस्थेला नवी दिशा
HESPRO Sports च्या माध्यमातून त्यांनी केवळ मैदाने उभारली नाहीत, तर खेळाडू घडवणारी आधुनिक, शिस्तबद्ध आणि दीर्घकालीन क्रीडा व्यवस्था निर्माण केली.
राष्ट्रीय कबड्डी प्रशिक्षक म्हणून त्यांनी गुजरात राज्याच्या १९ वर्षांखालील महिला संघाचे मार्गदर्शन केले असून, पुणे विभागीय क्रीडा संकुलातील अत्याधुनिक कबड्डी प्रशिक्षण केंद्र त्यांच्या दूरदृष्टीचे जिवंत उदाहरण आहे.
पुरस्कारांची उज्ज्वल परंपरा
सोनाली निकम यांच्या कार्याची दखल राष्ट्रीय पातळीवर वेळोवेळी घेण्यात आली आहे. त्यांना यापूर्वी—
जनई मुक्ताई सामाजिक क्रीडा पुरस्कार (२०२०)
खशाबा जाधव राष्ट्रभूषण पुरस्कार (२०२३)
उत्तम भारती क्रीडा राष्ट्रीय पुरस्कार (२०२४)
असे प्रतिष्ठित पुरस्कार मिळाले असून, आता समाज प्रबोधन पुरस्कार मिळाल्याने त्यांच्या कार्याच्या शिरपेचात आणखी एक मानाचा तुरा रोवला गेला आहे.
पुरस्कार वितरण सोहळा
हा पुरस्कार वितरण सोहळा डॉ. सुनील बळीराम गायकवाड (माजी खासदार, लोकसभा) यांच्या हस्ते पार पडला. या कार्यक्रमाचे आयोजन सचिन पाटील यांच्या मार्गदर्शनाखाली करण्यात आले.
या सोहळ्यात महाराष्ट्रातील शिक्षण, आरोग्य, समाजसेवा, आर्थिक पत्रकारिता, क्रीडा अशा सहा विविध क्षेत्रांतील एकूण ६ मान्यवरांना पुरस्कार प्रदान करण्यात आले.
संपादक : कुमार कुलकर्णी
