साथीदार च्या खुनाचा बदला

साथीदाराच्या खूनाचा  बदला घेण्यापूर्वी जामिनाच्या खर्चाची तरतूद करण्यासाठी दरोडा टाकण्याच्या तयारीत असलेल्या सराईत गुन्हेगारांच्या टोळीला भारती विद्यापीठ पोलिसांनी अटक केली आहे. पोलिसांनी आरोपींकडून पिस्टल (Pistol), काडतुस यासह इतर 3 लाख 98 हजार रुपयांचा मुद्देमाल जप्त केला आहे. ही कारवाई बुधवारी (दि.9) रात्री साडेनऊच्या सुमारास आंबेगाव पठार येथील मोकळ्या मैदानात केली.

राधेमोहन उर्फ मुन्ना सिताराम पिसे (वय-19 रा. प्रेमा कॉलनी, वारजे माळवाडी), समीर ज्ञानेश्वर मारणे (वय-20 रा. मारणे हाईट्स, नऱ्हे गाव मुळ रा. मुपो भोडे, मुठा ता. मुळशी) यांच्याकडून पाच काडतुसे आणि दोन लोडेड पिस्टल जप्त केले आहेत. तर अर्जुन मोहन वेलदरे (वय-20 रा. आंबेगाव बु.), तुषार दिलीप माने (वय-19 रा. भेंडी चौक, आंबेगाव बु.), यश मनोज लोहकरे (वय-19 रा. राम मंदिराजवळ, आंबेगाव पठार), अनिल दिलीप माने (वय-20 रा. हरणाई कॉम्प्लेक्स, आंबेगाव बु.), ओंकार उर्फ मयुर दादासाहेब माने (वय-20 रा. गायमुख चौक, आंबेगाव बु.) यांना अटक केली आहे. तर दोन अल्पवयीन साथीदारांना ताब्यात घेतले आहे. आरोपी पोलीस रेकॉर्डवरील गुन्हेगार आहेत.

पुणे शहर आणि उपनगरांमध्ये दिवाळीची धामधूम सुरु आहे. लोक मोठ्या प्रमाणात खरेदी करत आहेत. दिवाळीच्या पार्श्वभूमीवर सराफा व्यावसायिकांकडून दुकानामध्ये मोठ्या प्रमाणात सोने-चांदीच्या दागिन्यांचा साठा करुन ठेवला आहे. दरम्यान, सिंहगड रोड आणि भारती विद्यापीठ पोलीस ठाण्याच्या हद्दीतील सराफा व्यावसायिकांच्या दुकानांची रेकी करुन सराईत गुन्हेगार दरोडा टाकण्याच्या तयारीत असल्याची माहिती पोलिसांना मिळाली. त्यानुसार पोलिसांनी आंबेगाव पठार येथील मोकळ्या जागेतून आरोपींना ताब्यात घेतले.

अटक केलेल्या आरोपींकडे चौकशी केली असता राधेमोहन पिसे याने त्रिमूर्ती चौकातील सराफा व्यावसायिकावर

दरोडा टाकणार असल्याची कबुली दिली. मागिल महिन्यात त्याचा सहकारी ओंकार लोहकरे याचा खून करण्यात आला होता. या खुनाचा बदला घण्यासाठी आणि गुन्ह्यामध्ये जामिनाच्या खर्चाची तरतूद करण्यासाठी दरोडा टाकणार होतो अशी कबुली दिली. आरोपींकडून दोन पिस्टल, 5 काडतुसे, 7 मोबाईल, 3 दुचाकी असा एकूण 3 लाख 98 हजार रुपयांचा मुद्देमाल जप्त करण्यात आला आहे. आरोपींना न्यायालयात हजर केले असता 11 नोव्हेंबर पर्यंत पोलीस कोठडी सुनावली आहे.

आपण सारे

संपादक : कुमार कुलकर्णी