परांजपे स्कीम्सच्या ‘अथश्री’ला २५ वर्षे पूर्ण; भारतातील ज्येष्ठ नागरिक निवास क्षेत्रात ६,००० रहिवाशांचा टप्पा, भविष्याभिमुख दृष्टीकोन अधोरेखित

April 19, 2026 आपण सारे

पुणे,- निवासी प्रकल्प साकारण्यात अग्रणी असलेल्या परांजपे स्कीम्स (कन्स्ट्रक्शन) प्रा. लि. या नामांकित विकसकाच्या ‘अथश्री’ या ज्येष्ठ नागरिक निवास उपक्रमाला २५ वर्षे पूर्ण झाली आहेत. भारतातील संघटित ज्येष्ठ नागरिक निवास क्षेत्राच्या घडणीत ‘अथश्री’ने महत्त्वाची भूमिका बजावली आहे. दूरदृष्टीतून सुरू झालेला हा उपक्रम आज सन्मान, स्वावलंबन आणि समुदायाधारित जीवनमूल्यांवर आधारलेली सक्षम व्यवस्था बनली आहे.

या महत्त्वपूर्ण टप्प्याचे औचित्य साधत, वडोदरा येथे ‘अथश्री’च्या ६,००० व्या रहिवाशाला घराचा ताबा देण्याचा सोहळा पार पडला. या कार्यक्रमात रहिवासी, व्यवस्थापन आणि भागीदार सहभागी झाले होते. आज ‘अथश्री’चे जाळे सुमारे १६ ज्येष्ठ नागरिक वसाहतींमध्ये विस्तारले असून, विविध शहरांमध्ये ३,००० हून अधिक ज्येष्ठ नागरिकांना निवास व सुविधा दिल्या जात आहेत. कार्यक्रमाची सुरुवात परांजपे स्कीम्सचे अध्यक्ष श्रीकांत परांजपे यांच्या भाषणाने झाली. त्यानंतर व्यवस्थापकीय संचालक शशांक परांजपे यांनी ‘अथश्री’चा प्रवास आणि वाढती गरज याविषयी मनोगत व्यक्त केले. यानंतर ‘अथश्री’मधील रहिवाशांनी सादर केलेल्या कलाप्रस्तुतींनी या समुदायातील उत्साह आणि सक्रिय जीवनशैली अधोरेखित केली.

या निमित्ताने परांजपे स्कीम्स कन्स्ट्रक्शन प्रा. लि.चे व्यवसाय विकास संचालक अमित परांजपे यांनी आरोग्यसेवा, वेलनेस, आपत्कालीन मदत आणि समुदाय सहभाग या क्षेत्रांमध्ये नव्या भागीदारी जाहीर केल्या. या उपक्रमांतर्गत अग्रगण्य आरोग्य संस्थांशी सहकार्य करून ओपीडी, आयसीयू, लघु शस्त्रक्रिया सुविधा तसेच कार्डियाक अॅम्ब्युलन्स आणि ऑन-कॉल पॅरामेडिक सेवा उपलब्ध करून देण्यात येणार आहेत. यासोबतच पडल्यास तत्काळ इशारा देणारी आणि महत्त्वाच्या आरोग्य निर्देशकांचे रिअल-टाइम निरीक्षण करणारी हेल्थ मॉनिटरिंग प्रणाली सुरू केली जाणार आहे, ज्याची माहिती डॉक्टर आणि कुटुंबीयांना उपलब्ध राहील. वेलनेस उपक्रमांतर्गत योग संस्था आणि तज्ज्ञ प्रशिक्षकांच्या मदतीने नियमित योग व फिटनेस कार्यक्रम राबवले जातील. तसेच FUEL School, Camlin, Origami Mitra आणि कन्सिअर्ज सेवा देणाऱ्या संस्थांबरोबरच्या सहकार्याद्वारे सर्जनशील उपक्रम, शिक्षण आणि घरगुती सहाय्य सुविधा उपलब्ध करून दिल्या जातील.

कार्यक्रमानंतर ‘अथश्री’मधील उल्लेखनीय योगदान देणाऱ्या रहिवाशांचा विशेष सत्कार करण्यात आला. यात अणु विज्ञान आणि सिग्नल प्रोसेसिंग क्षेत्रातील अग्रगण्य शास्त्रज्ञ डॉ. मोहन फडणीस; पद्मश्री पुरस्कार विजेते आणि आयआयटी कानपूरचे माजी संचालक संजय गोविंद धांडे; १९७१ च्या युद्धातील शौर्यासाठी वीरचक्र सन्मानित विंग कमांडर सुरेश कर्णिक; कर्करोग संशोधन क्षेत्रातील मान्यवर आणि टाटा मेमोरियल सेंटरच्या माजी वरिष्ठ शास्त्रज्ञ डॉ. रिता मुल्हेरकर; तसेच मराठी रंगभूमी आणि चित्रपटसृष्टीतील प्रसिद्ध अभिनेत्री वंदना गुप्ते यांचा समावेश होता. या सत्कार सोहळ्याने ‘अथश्री’ समुदायातील अनुभव, कर्तृत्व आणि सक्रिय जीवनशैली अधोरेखित केली.

यावेळी बोलताना व्यवस्थापकीय संचालक शशांक परांजपे म्हणाले, “ज्येष्ठ नागरिक सन्मानाने आणि स्वावलंबीपणे राहू शकतील अशी जागा निर्माण करण्याच्या साध्या विचारातून सुरू झालेला हा प्रवास आज हजारो लोकांचा विश्वास संपादन करणाऱ्या वास्तवात परिवर्तित झाला आहे. अक्षय तृतीया या शुभ दिवशी हा टप्पा गाठल्याने या सोहळ्याचे महत्त्व अधिक वाढले आहे. ज्येष्ठ नागरिक निवास म्हणजे केवळ घरे उभारणे नव्हे, तर जिथे प्रत्येकाला आपलेपणाची जाणीव होते, असे वातावरण निर्माण करणे हा आमचा उद्देश आहे. नाशिक, कोल्हापूर, नागपूर तसेच अहमदाबाद आणि जयपूरसारख्या शहरांमध्येही या क्षेत्राची मागणी झपाट्याने वाढत आहे.”

भारतामध्ये ज्येष्ठ नागरिक निवास क्षेत्राचा विस्तार ‘सिल्वर इकॉनॉमी’च्या वाढीसोबत जोडलेला आहे. वाढती आयुर्मर्यादा, बदलती कुटुंबरचना आणि स्वावलंबी जीवनशैलीची वाढती पसंती यामुळे हे क्षेत्र आता मर्यादित पर्याय न राहता मुख्य प्रवाहातील निवासी व्यवस्थेचा भाग बनत आहे.

अमित परांजपे म्हणाले, “भारतामध्ये ज्येष्ठ नागरिक निवास क्षेत्र नव्या टप्प्यात प्रवेश करत आहे. पूर्वी गरज म्हणून घेतला जाणारा निर्णय आता नियोजनबद्ध आणि जागरूक निवड बनत आहे. अनेक मिलेनियल्स आपल्या पालकांसाठी अशा समुदायांमध्ये गुंतवणूक करताना दिसत आहेत. महाराष्ट्र राज्य गृहनिर्माण धोरण २०२५ अंतर्गत ज्येष्ठ नागरिक निवासासाठी स्वतंत्र श्रेणी आणि ₹१,००० इतक्या नाममात्र स्टॅम्प ड्युटीची तरतूद हा या क्षेत्रासाठी महत्त्वपूर्ण निर्णय ठरणार आहे.”

भारताची लोकसंख्या रचना आणि सामाजिक परिदृश्य झपाट्याने बदलत असताना ‘अथश्री’सारखे उपक्रम वृद्धत्वाचा अनुभव नव्याने परिभाषित करत आहेत. काळजी, स्वावलंबन आणि सामाजिक जोड यांचा समतोल साधणारे असे समुदाय भविष्यातील ज्येष्ठ नागरिक निवासाची दिशा ठरवत आहेत.