१ मे ला पुणे- मुंबई मार्गातील बोरघाट मिसिंग लिंक मार्ग सुरू होणार
पुणे : बोरघाटातील वाहतुकीचा ताण कमी करण्यासाठी उभारण्यात आलेला ‘मिसिंग लिंक’ मार्ग लवकरच प्रवाशांसाठी खुला होणार असला तरी सुरुवातीच्या टप्प्यात फक्त हलक्या वाहनांनाच परवानगी दिली जाणार आहे. प्रशासनाच्या निर्णयानुसार पहिल्या सहा महिन्यांत जड वाहने तसेच ज्वलनशील पदार्थ वाहून नेणारे टँकर्स या मार्गावर धावू शकणार नाहीत. सुरक्षेच्या दृष्टीने ही खबरदारी घेण्यात आली असल्याचे अधिकाऱ्यांनी स्पष्ट केले आहे.
काही दिवसांपूर्वी द्रुतगती महामार्गावर ज्वलनशील पदार्थांनी भरलेला टँकर उलटल्याची घटना घडली होती. त्या अपघातामुळे तब्बल ३० ते ३२ तास वाहतूक ठप्प झाली होती आणि प्रवाशांना मोठा मनस्ताप सहन करावा लागला होता. अशा प्रकारच्या घटना टाळण्यासाठी आणि नव्या मार्गावरील सुरक्षेचा अभ्यास करण्यासाठी
मार्गावरील सुरक्षेचा अभ्यास करण्यासाठी सुरुवातीचा सहा महिन्यांचा कालावधी निरीक्षणासाठी ठेवण्यात आला आहे. या कालावधीनंतरच जड वाहनांना परवानगी द्यायची की नाही, याबाबत अंतिम निर्णय घेतला जाणार आहे.
*१ मेचे उद्दिष्ट आणि तांत्रिक चाचण्या :*
MSRDC ने १ मे हा मार्ग सुरू करण्याचा लक्ष्य दिनांक निश्चित केला असला तरी काही तांत्रिक कामे अपूर्ण राहिल्यास उद्घाटन थोडे पुढे ढकलले जाऊ शकते, अशी शक्यता व्यक्त केली जात आहे. एप्रिल महिन्यात या मार्गावर विविध वाहनांची चाचणी घेण्यात येणार आहे. या ट्रायल्सदरम्यान रस्त्याची सुरक्षितता, बोगद्यांची कार्यक्षमता आणि वाहतूक व्यवस्थापनाची तयारी तपासली जाणार आहे.
‘मिसिंग लिंक’ सुरू झाल्यानंतर लोणावळा ते खालापूर दरम्यानचा वळणावळणाचा घाटमार्ग टाळता येणार आहे. त्यामुळे प्रवासाचा कालावधी सुमारे २० ते २५ मिनिटांनी कमी होण्याचा अंदाज आहे. याशिवाय इंधन बचतीसह सुरक्षित आणि अधिक वेगवान प्रवासाचा लाभ प्रवाशांना मिळणार आहे. जगातील सर्वाधिक रुंद बोगद्यांचा समावेश असलेला हा प्रकल्प पुणे-मुंबई दरम्यानच्या वाहतुकीसाठी महत्त्वाचा टप्पा ठरणार आहे.
संपादक : कुमार कुलकर्णी
