‘आरसीबीसी ज्युनियर स्पोर्ट्स लीग २०२५’ स्पर्धा !!
पुणे, ३ डिसेंबरः रॉयल कॅनॉट बोट क्लब (आरसीबीसी) तर्फे आयोजित ‘आरसीबीसी ज्युनियर स्पोर्ट्स लीग २०२५’ स्पर्धेच्या रोईंगमध्ये बे ब्लेडर्सच्या अयान सौदागर याने सिंगल स्कल आणि सपोर्टेड स्कल या दोन्ही प्रकारांमध्ये अव्वल क्रमांक मिळवून दुहेरी मुकूट पटकावला. बुद्धिबळमध्ये तिसऱ्या फेरीअखेरीस नॉटिकल निन्जाचे युवराज कुमार आणि स्प्लॅश स्टार्सच्या अनय मोंगा यांनी सात गुणांसह संयुक्त आघाडी मिळवली.
कँप येथील आरसीबीसी क्लबमध्ये सुरू झालेल्या या १५ वर्षाखालील मुले आणि मुलांच्या स्पर्धेत रोइंग, बुद्धिबळ, टेबलटेनिस, कॅरम, पोहणे, लॉन टेनिस या मुख्य क्रिडाप्रकारांचा समावेश आहे. याशिवाय टग ऑफ वॉर, फुसबॉल अशा मनोरंजनात्मक खेळांचाही समावेश या ज्युनिअर लीगमध्ये आहे. या स्पर्धेचे उद्दीष्ट्य लहान मुलांमध्ये क्रीडा संस्कृती निर्माण करणे तसेच विविध खेळांच्या माध्यमाव्दारे संघभावना, खिलाडुवृत्ती, सकारात्मक दृष्टीकोन अशा गुणांना प्रोत्साहन देणे आहे. स्पर्धेत एकूण १०० हून अधिक मुले आणि मुली सहभागी झाले असून स्पर्धेत पॅडल पायरेट्स, बे ब्लेडर्स, स्प्लॅश स्टार्स आणि नॉटिकल निन्जा असे चार संघ एकमेकांशी स्पर्धा करणार आहेत.
स्पर्धेचे उद्घाटन आरसीबीसी क्लबच्या क्रीडा विभागाचे अध्यक्ष तसेच स्पर्धेचे संकल्पनाकार परवेझ सौदागर यांच्या हस्ते करण्यात आले. यावेळी सहभागी संघांच्या कर्णधार नुशीन नलवाला, सृष्टी कुमार, आभा अरोरा आणि तस्नीम रामपूरवाला यांच्यासह खेळाडू आणि पालकवर्ग उपस्थित होते. स्पर्धेतील विजेत्यांना करंडक, मेडल्स् आणि पारितोषिके देण्यात येणार आहेत.
स्पर्धेच्या रोईंग या प्रकारात वेग, अचूकता आणि नियंत्रण या कौशल्यांचे अचूक प्रदर्शन करत स्पर्धेत रंगत आणली. रोईंगचे सामने बंडगार्डन येथील नदीकाठी आयोजित करण्यात आले होते. बे ब्लेडर्सच्या अयान सौदागर याने सिंगल स्कल आणि सपोर्टेड स्कल या दोन्ही प्रकारांमध्ये अव्वल क्रमांक मिळवून ज्यामुळे त्याच्या संघाला सुरूवातीलाच गुणतक्त्यात आघाडी मिळाली. पॅडल पायरेट्च्या जिदान नलवाला आणि स्प्लॅश स्टार्सची अव्दिका देशपांडे यांची लढत संस्मरणीय ठरली. याशिवाय डेमिरा गांधी, अब्दुल कादिर उमरेथी आणि अनय ढवळे यांनीसुद्धा चमकदार कामगिरी केली.
बुद्धिबळ क्रीडाप्रकारामध्ये तिसऱ्या फेरीअखेरीस नॉटिकल निन्जाचे युवराज कुमार आणि स्प्लॅश स्टार्सच्या अनय मोंगा यांनी सात गुणांसह संयुक्त आघाडी मिळवली. अनय मोंगा याने पॅडल पायरेट्सच्या सैफ अली याचा पराभव केला. युवराज कुमार याने बे ब्लेडर्सच्या कृष्णा पांचाळ याचा पराभव करून महत्वपूर्ण गुण मिळवला. स्प्लॅश स्टार्सच्या डेमिरा गांधी याने सईशा मौरजानी याचा पराभव केला.
स्पर्धेचा सविस्तर निकालः बुद्धीबळः तिसऱ्या फेरीनंतरचे निकालः
अनय मोंगा (स्प्लॅश स्टार्स, ७ गुण) वि.वि. सैफ अली (पॅडल पायरेट्स, ६ गुण);
युवराज कुमार (नॉटिकल निन्जा, ७ गुण) वि.वि. कृष्णा पांचाळ (बे ब्लेडर्स, ६ गुण);
डेमिरा गांधी (स्प्लॅश स्टार्स, ६ गुण) वि.वि. सईशा मौरजानी (पॅडल पायरेट्स, ५ गुण);
योहान गांधी (स्प्लॅश स्टार्स, ४.५ गुण) पराभूत वि. झेऊस भारूचा (पॅडल पायरेट्स, ५ गुण);
लक्क्ष मोटवानी (स्प्लॅश स्टार्स, ४.५ गुण) वि.वि. हृदय सुराणा (पॅडल पायरेट्स, ३ गुण);
मुदीत शहा (नॉटिकल निन्जा, ४ गुण) बरोबरी वि. सार्थ खरात (बे ब्लेडर्स, ३ गुण);
अनिश मिरापुरी (नॉटिकल निन्जा, ४ गुण) वि.वि. आनंद धनंजय दानवे (ब्ले ब्लेडर्स, २ गुण);
दिवी संघवी (नॉटिकल निन्जा, २ गुण) पराभूत वि. आयान सौदागर (बे ब्लेडर्स, ४ गुण);
रोईंगः सिंगल स्कलः आयान सौदागर (बे ब्लेडर्स, ८ गुण); अव्दिका देशपांडे (स्प्लॅश स्टार्स, ७ गुण); झिदान नलवाला (पेडल पायरेटस्, ६ गुण);
सर्पोटेड स्कलः १) अनय ढवळे आणि आयान सौदागर (ब्ले ब्लेडर्स); २) देमिरा गांधी आणि अब्दुलकादीर उमरेठी (स्प्लॅश स्टार्स); ३) युवराज कुमार आणि अझिर सौदागर (नौटीकल निंजाज्); ४) झिदान नलवाला आणि साईशा मौरजानी (स्प्लॅश स्टार्स)
संपादक : कुमार कुलकर्णी
